وين الرفيق اللي على مواصفاتي
وقت الرخاء والضيق يضحك حجاجه
يزيد مع زود الليالي ثباتي
ما فيه لا مال الزمان انعواجه
مليت من رفقة كثير الشماتي
دايم أنا وياه هوش ولجاجه
نمشي جميع ونختلف باللغاتي
تقول ما يفهم كلامي خواجه
عيت صفاته تنطبق مع صفاتي
وأفكارنا ما تقبل الاندماجه
ضحيت من شانه على حساب ذاتي
أهين نفسي واتحاشا إحراجه
مافادني صبري معه والسكاتي
حتى لو انه ضايع في عجاجه
مير الردي ما يعرف التضحياتي
اللي يعرفه مكسبه من خراجه
لا صار ما له مصالحة ما يحاتي
يبيني اتبع مسلكه وانتهاجه
ما حثته نفسه على الطايلاتي
بيس المزاج وبيس منهو مزاجه
عجزت اعدل عوجه المايلاتي
بعض التغاضي والمجامل سماجه
واليوم قررت اشطبه من حياتي
معاد لي في رفقة النذل حاجه
