قالوا توجه قلت ودي على الشرق

افرح ليا سقت الركايب مشرق

احب ممشى الشرق عن جملة الطرق

حب لجا في وسط قلبي وورق

من حب ريم طارق مهجتي طرق

حبه على شريان قلبي تطرق

اصارع الهاجوس واجاوب الورق

حسبي على اللي للحبايب يفرق

من ينقذ اللي في بحور الهوى غرق

كنه سجين بالكلام يتشرق

خشف سرق قلبي على غفلتي سرق

وان جيت يمه عن عيوني تدرق

طالعت فيه وطالعت عيني البرق

وقفيت منه ودمع عينه تزرق

والحب مثل الموت ما بينهم فرق

مير المحب بحالته ما يبرق