يا كاتب أكتب بالقلم عشرة سطور
وارسم على بيض الورق مع سطوره
أسباب هيضٍ عقب أحاسيس وشعور
كلّ على خافيه عبر شعوره
علمٍ لفانا باسرع الوقت مخبور
الله ولا علمٍ يجي بالضروره
قالوا جرى الجاري عسى يبطى الجور
على فهد كساب مجده بدوره
يا اللّه يا جابر عزا كل مكسور
أجبر عزا سلمان واخوان نوره
بأغلى فقيد جاله الاجل مامور
عساه بالجنة تلقاه حوره
يا منزلٍ سورة هل الكهف والطور
ومجري سفينة نوح باعلى بحوره
يوم الخميس وعاد يومه على الدور
كلّ يقاسي من فراقه عسوره
صقرٍ ربا في بيت صقار لصقور
بيت الأمير اللي اطوالٍ شبوره
سمو الأمير اللي ركب واعتلى الكور
بشداد أبوه اللي زهت له نشوره
واللي مدح سلمان ما يلحقه زور
واف الخصايل والفعول مخبوره
عساه من لوعات الايام ماجور
تبطي حياته ما يجي له كدوره
دنيا بها لذات وأفراح وسرور
ولا بد من عقب الحلاوه مروره
وصلوا عدد ما يطلع الفجر بالنور
وعد النبات اللي تعاقب زهوره
على رسول قوم الدين منشور
أشرف نبيّ زود الله وقوره
