الموت حوض كلنا واردينه

إن قصرت الأيام وإلا الدهر طال

والآدمي لو طولت به سنينه

طرقي بها الدنيا ومقفي ورحّال

وكل آدمي مكتوب له في جبينه

يومه وبيدين الولي كل الآجال

لكن موت أهل المكارم غبينه

مثل فهد موته غبن كل رجّال

جانا الخبر من هوله مكذبينه

لين الفجيعة صيتها بالوطن جال

معذور من هلت من الدمع عينه

ومعذور منهو ضايق الفكر والبال

ما هو بحّنا وحدنا فاقدينه

كل الوطن يفقد فهد طيب الفال

مرحوم يا اللي بالثرى دافنينه

بيوم الخميس اهمومنا كنها جبال

ومرحوم يا اللي بالشرف ذاكرينه

وذكراه لا يمكن عن البال تنزال

لا شحوا الشحّاح تصخي يمينه

وبيته لمن ينصاه ملفي ومدهال

وريث مجد ومن قصور حصينه

يصخي بما يملك من الجاه والمال

نفسه لمن هم يطلبونه معينه

يقضي لوازمهم وللصعب حلال

ندعيك يا منزل علينا السكينه

اتنزّله في جنة الخلد منزال

ما مات وأشبال الأسد في عرينه

معربين الجد والعم والخال

وأمير نجد اللّه بفقده يعينه

سلمان خير وللوطن عز وظلال

والموت حوضٍ كلنا واردينه

إن قصرت الأيام وإلا الزمن طال