ليت الإذاعة ماسمعنا خبرها
وليت المنايا ماخذت نجل سلمان
نجد العزية غاب عنها قمرها
هلت عبايرها على ذيك الأوجان
تبكي على شيخٍ حياته نذرها
في خدمة بلاده بذل كل ماكان
من مدته يمناه كلٍ شكرها
وإليا عطى يعطي ولاهوب منان
خزينته دون العرب ماذخرها
كم واحد ينصاه لاجاه ديان
تشهد مداينها وتشهد هجرها
ويشهد على ماقول حضرٍ وبدوان
فهد عوين اللي شكى من دهرها
لا عجز من حمله تنصا بليهان
ساس الكرم والجود منبع فخرها
ريف الضعوف إللي فقارى ويتمان
ماخلق مثله في خلايق بشرها
ولاجابت الخفرات مثله في الأزمان
نسل الملوك إللي بعيدٍ نظرها
إللي حمت بسيوفها كل الأوطان
ياالله ياجابر عظام كسرها
تجبر عزا سلمان في طير حوران
عساه في الجنة ويقطف ثمرها
في عالي الفردوس نازل وسكان
عسى السحابة يوم يمطر مطرها
يمطر على قبره حقوقٍ ودان
