نبي نرثي فهد لو الرثا دايم يثير شجون

شعور ما حبسها ظامري يوم انشحن جابه

آمنا بالقضاء واللي كتب في سنته مسنون

إله قدر الآجال في ما قال بكتابه

امرنا الله نصبر وانزل الآيات بالمضمون

على ذربه لسان محمد المبعوث وافضابه

ولا نجزع من اللي قدره خلاق كل الكون

صبرنا لحكمته واللي قضاه الرب نرضابه

ولكن دمعة الرحمة تجي من حيث لا تدرون

ومدام ان البكاء رحمه دموع العين غلابه

الا يا عين هلي وازعجي من دمعك المكنون

تعابير العيون اللي إلصاف الدمع سكابه

وليا قلتوا علام العين هلت قلت لا تكفون

دعوها تنثر العبرة على الاوجان صبابه

على فقد الامير اللي عليه اهل الوطن يبكون

كبار الشعب وصغاره بعد ما راح منصابه

جميع الناس مفجوعه على غيبة فهد ينعون

بعد ما اظلم سماء شبه الجزيرة حزت غيابه

عسى روحه بجنات النعيم وجسمها مصيون

اليا من كل ميت حاسبه مولاه بحسابه

رحمك الله يا شيخ توارى بالثرى مدفون

كريم النفس واليمنى ماهي للمال قضابه

يمينه تبذل الجزله ولاهي تعتني بالدون

ولا عمره عطا الهزلة ولا يوم تمعنا به

ولا طالع رصيده بالبنوك وزود المخزون

ولا جمّع رصيد بالخفا ولا حط حسّابه

كريم من صغر سنه براس المرجلة مفتون

وليا منك نصيته وانت متضايق تهقوا به

رهن نفسه بحزات الشدايد والعرب يدرون

دفع تسعين مليونٍ إلناس جوه منصابه

سليل اللي ليا كبرت نوايبنا عليه اتهون

صغيرة في نظر عينه على ماهو تورا به

وسيع المقدرة والمعرفة يوم اللزم مبخون

الى كبرت مصايبنا نجي سلمان نلجا به

نذر نفسه لشعب المملكة واصبح لهم مرهون

فتح صدره بلا منه لهم ومشرّع بابه

ولاهو يكشف الغره على اسرار العرب مأمون

ولا يسمع من الواشي ولا قد رد له جابه

ملا قلبه من التقوى عسى ربه يجي له عون

وبعد يجبر عزاه وياجره عن كل مانابه

فضل سلمان ما يحصى وله في كل بيت ديون

وليا هبت علينا عاتيه رحنا انتذرا به

عسى عمره طويل بدعوتي والناس له يدعون

بحق اللي بعث رحمة إلكل الناس واصحابه