هول الفجيعة خمد الشعر تخميد
وابطيت ما جالي من الشعر قافي
آخذ واقول الله يبيحه تراديد
مرحوم يا ذاك الامير السنافي
عليه ذربين النشاما مواريد
لو كان من دونه سهول وفيافي
طلق المحيا نادر فالاواليد
انا اشهد انك يابن سلمان وافي
طموحك ابعد من جميع المقاصيد
شلت الحمول الكايدة والخفافي
العقل بك والدين والحلم والجيد
لبست لك بشت من العز ضافي
اخذت من دنياك سمعة وتمجيد
وخليتها يومه غفا كل غافي
قفيت وانّا راكعين وسواجيد
ندعي وحزنك داخل القلب دافي
لو شفت حزنك في وجيه الاجاويد
عرفت كيف الناس للطيب تافي
عساك في جنة صدوق المواعيد
مع الكرام الصالحين النظافي
ويسلم لنا من شوفته عندنا عيد
سلمان قدره ما عليه اختلافي
مادام راسه حي حنا مساعيد
نطلع مطاليع العلا ما نخافي
يالله لعل سنين عمره تماديد
آمين قلناها ومن قلب صافي
