تهيض الضماير لا حصل ما حصل يا ناس
وانا هاضني موتة فهد ولد سلماني
سلايل حرار للعرب يرفعون الراس
الى اشتدت الأزمات تلقى لهم شاني
وابرفع عزى لابو المكارم عريب الساس
امير الرياض وعزها طير حوراني
مصابك مصيب قلوبنا والضمير احتاس
تضايقت والله والخير هز وجداني
خبر من غدا للطيب يا سيدي نبراس
شهادة وفاء يشهد بها القاص والداني
فقيد الوطن مثله بوقته عديم اجناس
به الدين والأخلاق والحلم وإحساني
ولا لوم قلبٍ ذابه الهم والهوجاس
على خيّر يسعدك لا جيت له عاني
ولو تذكر افعاله شكى الحبر والقرطاس
فعوله كثيرة مالها حد ياخواني
وابطلب عسى الله يرحمه صادق الأحساس
إلهي عساه بوسط جنات عدناني
الأعمار محسوبة بالأيام والأنفاس
ومن جاه يومه راح لو كان ماكاني
تدابير محيي القاع وعروقه اليباس
ولا مع ولي الكون مدبر ثاني
صلوا على المختار ما ذعذع النسناس
وما ناحت الورقا على خضر الأغصاني
