قال من حده زمانه وانجبر
والليالي مع زمانه مايلات
اشتكي وابكي واداري ما ظهر
من دموع من عيون شاقيات
العمر يمضي والى فات العمر
بالدقيقة والقفول مقفلات
شانت الدنيا بعيني وانهمر
دمعي وثارت جروح خافيات
عفت نوم العين رافقت بالسهر
بس اسامر هالنجوم الساطعات
وبالسهر قلبي على مثل الجمر
موقدات وسط قلبي كاويات
من سبب مابي من هموم وكدر
من سيوف غادرات طاعنات
حيلتي ضاعت وسلواي الصبر
وارجي المعبود صبري والثبات
طالبك يالله من حزنه مقر
عايش محزون والناس بحياة
اكتب الابيات من دم حمر
والحروف بخاطري والذكريات
والختم صلوا على سيد البشر
عد نبت بالبراري نابتات
او عدد ماهل من مزنة مطر
وانبتت في ارضها عشب ونبات
