شفتك وطاحت لهفتي بين الأقدام
ومات الكلام بداخلي قبل أقوله
وينك قبل طلعتك هذي من أعوام
ما كن لك غالي ولا لك حموله
ياما على شانك تجرّعت الآلام
وظلمت نفسٍ في هواك امهبوله
يا جاحدة يا هاجرة وينك العام
يا ظالمة يا قاسية يا زعولة
أنا تمنيتك معي طول الأيام
وما كل من يحلم بشيٍ يطوله
وينك قبل ما تذبل شفاه وانسام
وينك تشوفين الخفوق ومحوله
إنهد بي في غيبتك حيل وعظام
وضاعت معك قوة صمودي وحوله
ما كننا اللي من زمن نبني أحلام
وما كن لك فارس تمطّى ذلوله
إنتي إهي ولا الزمن كله أوهام
هذا البدر أو ذي بداية افوله
شفتك وشفت الموت في روس الاعلام
واللي يشوف الموت يذهل ذهوله
قولي ولك مني أقول إيه قدّام
وتجي لك كفوفي نديّه خجوله
وشفتك وطاحت دمعتي تحت الأقدام
ومات الكلام بداخلي قبل أقوله
