جعل سهله تمطر عليها المخاييل
واوايل الوسمي تساقي وطاها
دار الملافخ عمها وابل السيل
دار الرجال اللي عزيزن بناها
ويضفي على حوشن بجنبه مقاييل
ويسقي نواح الحوش واللي رباها
حُوشن سكن به ذابح الفطر الحيل
غيث الضيوف اللي تشفق عشاها
أخوي ما مثله بكل الرياجيل
ما قط نفسه بينت لي جفاها
همه يداعبني ليا طول الليل
وعيني على فقده تزايد بكاها
غالب رحل عني على طلعت سهيل
باخر شهر خمسة وحالي براها
وقامت تهل العين دمعن بلا كيل
وجابت من الحسره محاصيل ماها
أخوي عقب اللي شعاء مقدم الخيل
شلفاه يشكي جبها من عصاها
شليل نطاح الوجيه المقابيل
ليا بان مفعول الرجال ورداها
وأخوي أماريبه ليا ديح الميل
كسره حشر نفسي وروحي طواها
ماعاد عقبه يا محمد تعاليل
ودنياك كلن يشتكي من غثاها
راعي معاميلن يكثر بها الهيل
والحشو من فوق الصيانا رماها
تذبح لوافين الرجال المشاكيل
اللي تنزح ضدها عن حماها
محط لحسابه بيان وتفاصيل
ويمناه يعم الضعافي عطاها
ليت الأمير لغربي الحوش ما شيل
وسووله الحفره وغزو حصاها
وقمت أتوجد وألحق الويل بالويل
لو القبايل قدمت لي عزاها
وليا مرني ممدوح شفت البهاذيل
ونواف حتى النفس بيح خفاها
صغارن لحقني من سببهم غرابيل
وليا نشد نواف حالي رعاها
وياالله يا مرسل على الرسل جبريل
يا عارفن سير النفوس وفناها
تظلله في جنة الخلد تظليل
وتجبر عزاء اللي حسرته ما نساها
أخوي بالخوه كسب له تنافيل
المال واحد والأمور احتواها
والله لأغني فيه وأكثر القيل
والصحف تنشرها على من قراها
