يا صعبها لا صار في خاطرك شي

ودك ولا ودك تقوله وحيران

مثل المريض آخر وسيلة له الكي

يبغى الحياة وشاف موته بالأعيان

ياللي هدب عينك قبر عاشقٍ حي

صمتك همس لي كان ماني بغلطان

وبين اهتزاز الصورة ورعشة يدي

حسيت بانسان سكني وأنا انسان

وطويت في وسط الحشا لهفتي طي

طي الهبايب نبت لدنات الأغصان

وشي فيّ كانك ناوي الهجر وش فيِّ

خلك صريح وقولها بفم مليان

وياصعبها لا صار في خاطرك شي

ودّك ولا ودّك تقوله وحيران