نجدٍ وسيع ويأخذ الحي والميت

مفتحين ابوابه اخوان نوره

حده بحر جدة اليا منتج الزيت

واللي وراها زود ما أعرف حكوره

ال السعود مطوعين الطواغيت

من ماكرٍ ماجاء التبع في صقوه

من ماكرٍ نادر هل العرف والصيت

مافيه تبع.. والا فروخ محقوره

هدوك يانجد الصعب لين حنيت

عقب الهدير اللي تروع زفوره

وأطعتهم من حيث ماصغوبك اصغيت

أطوع من الوالد لتالي بزوره

مرحوم ياعودٍ على نجد عييت

وأحييت فيه الدين بعد دبوره

مفارسه يصبح بها الدم ويبيت

والذيب يشرب منه ويكب سوره

ولولا كذا ما كان فوقه تعليت

وأخذت بزمامه وركبت كوره

يادلتي بدلتها بأم حنحون

ونار العشاء تبدلت بالسراجي

وقدّت حطبها ماشريناه بديون

ماله ثمن ياكود قول النهاجي

والنجر بدلنا دنينه بطاحون

ومحماسنا الاول تبدل بصاجي

وبدلت نسناس الذواري بفريون

وبدلت مرقاب الضحى بالحراجي

تبكي سمان الهجن من عام ستين

تبكي على قطع الفرج كل حره

تبي الشداد وطق روس الحواجين

وأن درهمت وحي للارسان صره

نجدٍ صعيب ومعسفه غيرهن وين

سفاين الصحراء بوابير حره

تحمد الله وارتعي لاتعنين

يجيك بالاخبار سلكٍ نجره

ولا حديدٍ نطعمه صاع بنزين

طرفة نهار ونجد كله يفره

تبكي الدلال اللي فناجيلها صين

النجر يبكي والبكاء ما يسره

غدا عليه الصوت بين العشاوين

ماعاد يوحي للرجاجيل كره

يانجر لاتبكي ترانا غنيين

معاد لنا فيك مثقال ذره

نجيب طاحونه وكهرب وسكين

شغلك سنه تكفيه ساعه تمره

يا بندقي هاذي شريتك عشاقه

ماهو طرب والا لغاره ومغيور

من شبتي قلبي يحب الدفاقه

والمحزم اللي فيه دقات وقمور

يابندقي ماعاد به ظبي نرميه

مير استريحي مثل بندق هل السوق

الظبي راح ولابقى غير طاريه

تريحي عقب العناء بأم صندوق

هلال لضلع العفرويش جابه

أطر عليّه منزلي في طروفه

الخط ليته مبعدٍ عن ترابه

ماودي امره ولا أفرح بشوفه

أنا وابويه قد نزلنا جنابه

نجلس على كيفٍ حدانا يحوفه

أن جاء مسير قلت يامرحبابه

وان رحت أن يمه خطاي مخلوفه

ياهلال انا من تالي الوقت محتار

مالي جدا الا ونتي ونهتاتي

عينت ناسٍ تكرم الضيف والجار

اللي كبّر واللي يقولون ماتي

هيض علي اللي بدا القاف واختار

واختار من زين اللحون كلماتي

وقام يتفكر في زمانه وماصار

وأطرت عليه علومه الاولاتي

الوقت ماش أحدٍ يرده اليا دار

وماقدر المولى على العبد ياتي