أحسن لي أسكت وأكتم الشوق وأغيب

وأقول يكفي يا خفوقي فضايح

وارحل مثل ضيفٍ نسوه المعازيب

ما صاح له يوم انكف وشد صايح

شدّ الذلول وما لقى له مزاهيب

يوم الزمن وجهه عن البعض شايح

أرحل وخَليّ ما عليّه مطاليب

وآخذ همومٍ رافقتني رجايح

والفي على ذيب الخلا وازهم الذيب

وأقول قل لي وش بلى الحظ طايح

ارحل حشيمٍ ما لحقني ولا عيب

وأقول وفّر يا زماني نصايح

أخير لي ما الطم ولا أشق لي جيب

وأعيش عمري بين نادب ونايح

وأقول يا معبود يا عالم الغيب

العمر غادي يا ملاذي ورايح

لا صرت راضي ما عليّ أي تثريب

أحضن همومي واعتبرها منايح

واحسن لي اكتم وأجحد الشوق واغيب

ما نيب ناقص يا خفوقي فضايح