لو كان ربحي ما يجيب التكاليف
أنا على ممشى هل العز ممشاي
ممشى رجالٍ تكرم الجار والضيف
وتعقد على درب الوفا قاسي الراي
حتى ولو من وقتهم حافهم حيف
كلٍ لوجهه في المواقيف حماي
ربعٍ لهتاش الخلا في القسا ريف
ومنصاً لمن جاهم من الوقت شكاي
وزبنٍ لمن لحقه ضهود وتخاليف
من قوم والا عن بني عم جلاي
درب الرجال اللي تعلى المشاريف
ما حيد عن درب المشاكيل بخطاي
أمشي مع الطيب واردّ المعاريف
واقابل المقبل ومبداه مبداي
ولاني على المقفي كثير التحاسيف
أجازي المقفي بنسيان وإقفاي
ياحيف يابعض الرجاجيل ياحيف
خيره عليه وللمعاريف نساي
ويشوف نفسه كاملٍ بالتواصيف
مداح نفسه في الأجاويد حكاي
وهو على ربعه كثير العجاريف
لا حاذفٍ عنهم ولا بالحصى جاي
