حنا نحب الدار في كل الاحوال

نحبها من حبنا للحكومه

حب حقيقي ما دخل فيه مدخال

صادق غلاها بينات رسومه

ما هو غلا من شان نكنز به المال

صدق الولاء فيه القلوب مختومه

حقيقة ما تحتمل قول وجدال

الشك زايل والبلاد محكومه

بقيادة اللي شوفته تشرح البال

ونفسه على شعبه كريمة رحومه

فهد.. فهد.. نسل البطل.. طيب الفال

فهد ملكنا جعل ربي يدومه

ما حط بين الشعب وقيادته جال

كل قبل ياصل قضاله لزومه

الشعب واحد والولاء صدق الافعال

لا عنصرية.. لا شتات.. وخصومه

دار لها في ذروة المجد منزال

من لامنا فيها عسى الله يلومه

لا جالها الخايف نسي ضيم الاهوال

يرقد ويامن ويتلذذ بنومه

بين الدول للعدل مضرب للامثال

ومقدره ومشيمه ومحشومه

يهيم فيها المجد والعز يختال

وهي الفخر ما بين هومه وقومه

من دونها نبيع الاعمار بالحال

ونقدم على الموت الحمر ما نسومه

ولا نقبل مخادع وخاين ومحتال

يظهر ما لا يبطن وينفث سمومه

حنا صعوط لمن دخل راسه هبال

لا غواه شيطانه وزيَّن حلومه

ينكس ذليل.. محبط.. خايف.. ذال

واليا طرينا له يضيّع علومه

انا.. بجاه.. منزل آيات الانفال

يحفظ فهد ويديم عز الحكومه