الا ومع ذلك لك الله لنا كار

عن جارنا ماقط نخفي الطريفه

نرفا خماله رفية العش بالغار

ونودعه له النفس القويه ضعيفه

ولا نبدي الخافي الى صار ما صار

يفلج قصير البيت لو بان حيفه

والجار لابده مقفي عن الجار

وكل بجيرانه يعد الوصيفه

جار على جاره بختري ونوار

وجار علي جاره صفاة محيفه

دع بالك الجارات يازيد مجنب

عن الشين حذرا لا تقرب حدوده

ترى الشيمه العليا بنا ما تغيرت

مواريث جدود مرثتها جدوده

ولي من قديم العمر يازيد شيمه

عن الجار لو شفت الضواري تروده

ماني بمن يشقى لتقريبها له

ولا باغي سرحي يخالط لذوده

ولا نيب لداد الى بيت جارتي

ولا باغي بالليل حلوى رقوده

ولا رافعن طرفي لشق بثوبها

ولا يعجبن يازيد حمرة خدوده

جاراتنا يازيد مثل امهاتنا

والاجواد ما تجعل دراها وقوده

ترى ذرى الجيران يا كاسب الثنا

على كل حال والخلايق شهوده

قالوا علامك يوم تبكي على حرب

وهم لنا عدوان ما ينبكوني

قلت البكا ماهو على البعد والقرب

ابكي عليهم عقب ما جاوروني

عن دربنا ياليت ما جالهم درب

ولا هلت العبره عليهم عيوني

اربع سنين وزملنا عندهم جرب

ما واوموا عليهن بالعصا يضربوني

عن ذودهم ذودي يقدم على الشرب

مر حولنا يشرب وهم يقهروني

يا عنك ما هم من هل الهزب والزرب

ولا هم بغرة جارهم ينظروني

ربع على الشدات والهون والكرب

ما اذمهم بأفعالهم يمدحوني

وان حل عند قطيعهن بالقنا ضرب

يتلون ابو جلال حامي الضغوني

تلقا دما الفرسان منهم تقل سرب

هذا طريح وذا عميق الطعوني

انتشر لهم بيضا من الشرق للغرب

والله ما نسى لابة قدروني

قصيرك اللي ما يصيبك يصيبه

وصا به الله لا تحسف به الطيب

حقه عليك تزود القدر هيبه

لياما يروح بزود حشمه وتوجيب

اللي يديهم بالمراجل مساهيل

لا عللوا ضيف ولا دلهوا جار

لا صار جارك ما يجيك وتجيله

بيته قريب لك وقلبه ما هو جار