الا يا وجودي وجد من شاف ما يكره

حداه الزمان وطاح بيدين عدوانه

على اللي طواني طيت السلك بالمكره

بحبه وبعناده وصده وهجرانه

حبيبٍ عيونه عين حرٍ على وكره

سهوم المنايا بين رمشه وحجانه

ولد ناس هاي وهاي والزين محتكره

صغيرٍ عيون الناس تحول من شانه

قبل لا تشرف واعرفه سامعٍ ذكره

مع الناس في حيه وربعه وجيرانه

انا كيف اباصبر لو ما شوفه الى بكره

ونا اللي حشايه منه ما طفيت نيرانه

مدام العمر له حد والموت له سكره

بطلب من المعبود عفوه وغفرانه