أضحك مع العالم وأشاركهم القوت
والنفس أصبّرها من اللي دهاها
أضحك وانا في داخلي هم.. مكبوت
والعالم الله في ظروفٍ.. يراها
واضحك وامنِّي حالتي واكتم الصوت
من خوف يظهر واقعي من عِناها
ما كني إلا عايش ابجو.. مبخوت
أمشي مع العالم وادوّر رضاها
بعض الحقايق مالها راس وسبوت
ما ينعرف وجهها من قفاها
بعض الحقايق تجلب الهم والموت
لا صار ما في قبضتك من وراها
مثل الخطوط الدائرية بلا اثبوت
ولا احدٍ يميز نقطة اللي بداها
واحسن البّس حالتي طيب وبشوت
واصبر وعند الله بشاير رجاها
ولابد ما الغيمة تجلى عن بيوت
والعالم المرضى يبيِّن بلاها!!
