ياما حلا عقب العشا شبة النار
عقب الهجوع الى رقد كل كوبه
بقفرية يا عبيد يودع له شعار
وسوات فنجال يشوق صبوبه
حبه على المطلوب من بن وبهار
يعجبك بالفنجال صبغه وروبه
كيف يجوز لشارب الكيف والكار
لو دوروا به غمزة مالقوا به
في مجلس فيه المشاكيل حضار
بغيبة ردي الحظ عنهم بنوبه
اللي يخزرون المسير بالانظار
تكاظموا والى جلس شوشوا به
تلافتوا على بعضهم بالانظار
وتغامزوا ما بينهم واضحكوا به
الناس فيهم يا فتى الجود هذار
مسترحل لا بليس زين ركوبه
عاض غرة مسلم غافل غار
يعرضه للناس لو ما حكوا به
دايم لغرات الاجاويد عقار
يظهر عيوب ولا درى عن عيوبه
وفيهم تبيني لا يسرك ولا ضار
ما غير يحسب للربايع ضروبه
وفيهم حصيني قبوع وقمار
يوصف على ما قيل به طير ذوبه
وفيهم بليهي على الكود صبار
يصبر ولو زادت عليه الصعوبه
لا جا زمان فيه غلين الاسعار
غدا لربعه بالمكايل جلوبه
وان جا نهار الضيق بالموسم الحار
يرخص بعمره ما يعد محسوبه
