يا الله يا منشي مزونٍ نوايض
يا عالمٍ بالبينه والسريره
يا واحدٍ سنيت خمس الفرايض
تجعل لنا في كل الاحيان خيره
طالبك يا مهون همومٍ عرايض
تفرج همومٍ بالضماير كثيره
أسبابها الانذال سر البغايض
هل الحسد واهل النفوس الشريره
الحاقدين أهل الحسد والغرايض
تقصر ايديهم بالامور العسيره
وانا يشرفني مثل عرف عايض
ابو سعد راع العلوم السفيره
ليا نخيته بالعجل ما ترايض
يفرع ليا قصّر بالأفعال غيره
طيبه لحساده والانذال غايض
عسا فداه اهل الوجيه الشريره
العد يروي لو حمى القيض قايض
والرس ما تاصل ضواميه ديره
وابن الحموله يحتمل للغلايض
يرسي جنابه للحمول الكبيره
قلته وأنا سبة جروحٍ نقايض
سود النوايا واليدين القصيره
اللي على النمه ايديهم حرايض
الحاسدين القاطعين البريره
