اشوف دياني وقف لي على الباب
يبي الوفا مني ويطلب حسابه
ما ينسي دين تقفاه طلاب
الدين ما يوفيه كثر الطلابه
يا فيصل اودعك توديع من غاب
لا تحتريه انه يجي من غيابه
غيبة دهر ماهي شهر عد وحساب
في مظلم ينهال فوقي ترابه
ابيك ما تجزع وتفزع وترتاب
ان جاك من ينعى ويشلق ثيابه
عمر البكا مافاد حي ولا ثاب
لو سر غيرك كان سر الندابه
وعليك باخوانك وربعك والاقراب
حقي عليك مواصلك للقرابه
وما بينكم لا ينقل الهرج سباب
ترى دمار الدار نقل السبابه
ومن الرجال الى تخيرت الاصحاب
تخير اللي مايبدل جوابه
مغلاق باب الشر حلال الأنشاب
زبن الدخيل اللي تنصا جنابه
وابعد عن الدوني ولو مرة طاب
لزوم يظهر لك مرار عيابه
وانص الرجال الى تخيرت الانساب
كل تعوض به ياكود النسابه
وانشد عن المربى ترى العرق جذاب
عرق الردا لابد يجذب اجذابه
بلغتك الاعلان من غير نجاب
والحر يعرف من خطاه وصوابه
