هواي بأول طايره تنحر جنيف
هذا هوى نفسي وغاية مناها
ما قصدي الترويح في مبتدا الصيف
ولاهو بحب في جنيف وهواها
في نجد عايش ما علينا تكاليف
في ظل حكام يشرف نباها
اخوان نوره خير من يقضب السيف
في حكمهم كل الجزيرة تباها
لكن ابا شوفة عديم التواصيف
اللي جميع الشعب مثلي بغاها
حر مواكيره طوال المشاريف
نايف ليا هاز الطويله رقاها
عساه سالم من جميع الصواديف
ورجله عسى المولى يعجل شفاها
متى على الشاشه تحط التواصيف
حتى تطير الطايره مع سماها
ترجع بنايف جعل ما جاه تخفيف
وجنيف يتركها ويرمي عصاها
دار يجيها تصبح اقطارها ريف
ياكبر حظ المملكة وان لفاها
ريف على شعبه وريف على الضيف
وسمٍّ على كبد المعادي كواها
وانا احمد الله يوم ما به تخاليف
سلامته ربي بلطفه رعاها
متى يعود ونهتني شربة الكيف
والمملكه ترقص طرب ياذراها
تم الكلام اللي بعيد عن الزيف
مشاعر مواطن بفكره بناها
وصلاة ربي عد وبل الهواتيف
على النبي صليت في منتهاها
