يا العين يا العين خلي ذا السهر كله
على الذي عشرتك برخيص باعوها
كثر السهر يا عيوني زود العله
والناس لو تعرف الاسرار شاعوها
خلي هجرني ومني ما حصل زله
لا وحسايف اعز الناس سووها
دمع نثرته خسارة ما انت كفوله
ينلاع قلبي اليا سيرتك جابوها
قلبي حشى بعدها ما واحدا حله
راضي بناره عقب فرقاه شبوها
تكفون ياللي عرفتوا الطب والعله
اجروح قلبي بعد فرقاه داووها
ما نيب انا اول حبيب قد بكى خله
يا كثر ناس هموم الحب ذاقوها
