سالم وغانم يا ذرا كل منيوب
يا فاتح لناصينه القلب والباب
يا نايفٍ من عالي المجد منتوب
متسلسلٍ من روس زاكين الانساب
بالشكر لله تلهج شفاه وقلوب
اللي جعل شكواك تشفيها الاطباب
ربٍ فرج لأيوب وأرجع ليعقوب
واللي ببطن الحوت له تاب وأناب
له يرفعون الدعوة أفراد وشعوب
يطيل عمرك بالسعد.. رب الارباب
يا شيخ لو يسمح لمن دونك ينوب
يفدونك الآلاف شبٍ وشيّاب
يا للي بكفك مشعل الجود مشبوب
والأمن رسّيته بعمدان واطناب
خططت له لين اكتمل كل مطلوب
وقفلت من دون الفتن كل الأبواب
لك موقفٍ في وقت الأزمات محسوب
ولا لعونك دون طلابه حجاب
وأمن الوطن صار المثل فيه مضروب
تشهد به الأجناب قدام الأصحاب
للعدل ميزانٍ بيمناك منصوب
تعتق به أرقابٍ.. وتقطع به أرقاب
لولاه ما شفنا حمى الدار مهيوب
ولا صار راعي الحق للظلم غلاب
ولك في سبيل الخير بصمات ودروب
عن حصرها يقصر مدى كل حسّاب
ولك الولا مع صادق الحب مكتوب
بقلوب شعبٍ عنه طاريك ما غاب
إحساسهم واحد وكل له اسلوب
ويا ما شعورٍ هاض ما خط بكتاب
وما ذعذع الغربي.. وما مال نبنوب
إسلم ودم يا شيخ.. ومجار ومثاب
