يارجل عن درب المقفين كفي
ما ضاقت الدنيا تراها وسيعه
لا تلحقين اللي مصيره مقفي
خليه في مسعاه يقلع قليعه
ويا نفس جوزي واستريحي وعفي
خليك يالنفس العزيزه رفيعه
البعد عن بعض المخاليق شفي
ومن باعنا لو كان غالي نبيعه
انا رفيقي من يوقف بصفي
يقض اللزوم ولايعرف القطيعه
وبعض الرجال عن اللزوم متخفي
ومن يترك الواجب قليلٍ نفيعه
اللي بعيد عن الوفا مايوفي
يصعب عليه الطيب مايستطيعه
الرجل بين والتجارب تكفي
يكفيك منطوقه وتعرف طليعه
اما كفو أو لا لقيته مصفي
جسم على هيكل سرابٍ بقيعه
