يا للي سألت وجيت تبغى تفاصيل
موجز حياتي قلب وانسان عادي
قلب نهل من صافيات الشهاليل
وانسان تلقى به جميل المبادي
ورغم الذي عانيت من كايد الويل
مازال حبي للجميع متمادي
أحب كل الناس من دون تفضيل
حتى ولو ما بادلوني ودادي
وأحب فعل الخير للناس بالحيل
هذاك هو طبعي وغاية مرادي
وأحب نسمات الهوى تالي الليل
ولون الغروب اشتاق له بازديادي
وأحب ضحكات الصباح المداليل
وتغريدة العصفور والنور بادي
وأحب نظرات المزون المخاييل
اليا استبد البرق فيها ينادي
وما اقول أنا اللي كامل بالمعاديل
الكامل اللي ترتجيه العبادي
وان كان قصدك يوم أغني مواويل
في لحظة فيها تهيظ فؤادي
لحظات مرت بي وقلت التماثيل
سحر الخيال اصوره باعتقادي
