يا الله ياللي تبعث أرواح الأموات
تلطف بحال اللي لعب فيه ظنَّه
ساعة أقول الموت وأنكره ساعات
يا كن في نفسي من العلم جنّه
أرجيك يا عالم بما تخفي الذات
يا والي ما تخفى الأسرار عنّه
ألطف بروحٍ وجدها اليوم عبرات
من بعد فرقا اللي خذا الموت منه
أمي عسى ربي يسكنك جنات
جنات ربي ما عطاها بمنه
أمي بعد صوتك هموم وويلات
أبكي وأخفي بالصدر ألف ونه
ما عاد لعيوني بَعْدها ملذات
حتى قليل النوم عقبك نسنه
أشرف على بيتك واطوّح بالاصوات
يا عل في روحك لصوتي محنه
بي عبرةٌ وانثر لها الدمع بسكات
أخاف يصحى نايم البيت منه
أقول والله لو ترد العبَاراتْ
وقت مضى لأعيش صدري مكنه
واجعل هميل الدمع يا يوه زخات
تمطر ثرى نجدٍ وتجعله جنه
كل السدارى بعد نوره بحسرات
واعيونهم والله بدمٍ بكنه
كل بعد فقده بوجهه علامات
من كثر دمعٍ هل والموت سنه
