سور وسياج

الدفا..
ما يوم حسَّ أن الوفا للثلجْ، أو فصل الشتا
أو للمطرْ يوم انتثرْ..
فوق النوافذْ والزجاجْ.
والجفا..
ما يوم في اطباعه غَفَا ولا صَفَا.. مثل البحَر..
ما شال هم للحجر.. ولو عاندت موجاته هاج..
والوفا..
جذر وعروق نخلاً جذوره في السما
وسعفه غدا أبْعَد وفوق قدّم فروض الابتهاج.
والحنين..
أتعب سنين.. ولا هُو يبي.. ولا يبينْ..
يقضي حياته بانزعاج..
والمسافة..
رغم الدروب .. وليل وغروب..
ورغم السدود.. أو الحدود.. ما همّها سور وسياج..
والمكان.. نفس المكان.. اللي زمان.. إيّام كُنا في أمان..
وضمّنا.. كل الزوايا تشتكي واسألها دايم: وشْ بِك؟؟
تعلنْ تقودْ الاحتجاجْ..
وانا هنا.. وحدي هنا.. أكتب قصايد في الهموم. وانثر على طيف وغيومْ
ما حس فيها الا أنا لأن الدفا.. ما يوم حس ان الوفا
للثلج أو فصل الشتا أو للمطر يوم انتثر
فوق النوافذْ والزجاجْ.
ولأنّ النسيم .. ما يوم كان من الجحيم
ولا لبسْ من ريح.. تاج..
والخط لو هو مستقيمْ لو هو سليم ما شال هَمّ الاعوجاج.
ويوم خَلَق ربِّي العقول تلقى ثقيل وراسياً
وتلقى مصابٍ بارتجاج
وفينا قلوبْ تجرح تتوب وتستغفر للذنوب..
وفينا قلوب جرح البشر عادي!! مزاج!
فضّلت اسامر وحدتي، حولي شموعي وحسرتي
واقلامي، واوراقي، علاجْ.
هذي سوالفْ قصتي مثل الأسير
اللّي سكنْ بيت الحديد
وعنده أمل رغم القيود
إنْ له خراجْ.