قم يا المقهوي دن نجر ومحماس
واحمس لنا من حب صنعا نماها
احمس وزين حمسة البن بقياس
دقه ولقمها وعجل سواها
وصبه لممرور على الخيل مدباس
تقفي عنه صم الرمك لانصاها
من فوق ما تاخذ على الخيل مرواس
لاجدعت خبثات الانفس حذاها
واثنه لمن حوله على الزبر جلاس
اهل السموت اللي بعيد مداها
ابن عبيكه هرجته مابها باس
تطرب لها كرام اللحى من حلاها
طول الجدار وقصرت الرجل نوماس
لاصار ما للرجل داع دعاها
تصير بعيون الرفاقه معك باس
لا صار ما تدعى تره من عناها
يصير قالات ويصير لولاس
ونوب من الادنين ياتي بلاها
قلبك يصد ويضرب القلب عوماس
والنفس تقدح عقب زايد غلاها
خلك على بابك تقل لون حراس
لاجوا عليهن محترين عشاها
لاجن مع الخل الشمالي لها اضراس
والكل تشكي رجلها من حفاها
نرحب بهم من قبل تجديع الالباس
نقلط لهم تمر الحلا من نماها
ونذبح لهم كبش مربع بالاطعاس
نقلطه من قبل يقرب مساها
هذي سلوم جدودنا قبل من راس
واللي بعدنا كان ربي هداها
