يا عيوني سبلي ماك وأصخي بالدموع
نثر عبرات المدامع لمثلي لايقه
إنثريها وإغسلي ضيقةٍ بين الضلوع
أبعديها تصبح النفس منها فايقه
يا عيوني في البكاء نفعة القلب الجزوع
والبكى فيه إنشراح الصدور الضايقه
كم قضيت الليل بالهم والعالم هجوع
والعرب غيري لحلو المضاجع ذايقه
ابتدي من يوم تبدى نجومه بالطلوع
لين أشوف الصبح نجمة عموده سايقه
يستعد القلب لمصارع همومي جموع
من عصر وهموم قلبي عليه موايقه
الهموم أسراب من كل شكل وكل نوع
والعنا والضيم لأهل القلوب الشايقه
آه ألا يا لوعة القلب لوع فوق لوع
من عشيرٍ ناسي العهد مدري بايقه
أتحرى شوفته من ربوع اليا ربوع
ما قويت الشوق والصبر ماني طايقه
يا هبوب النود ودي سلامي للقطوع
بلغيه الهم معيه شبك علايقه
وإنشدي خلي وهاتي جوابه في الرجوع
عجلي به ودي أمسي وروحي رايقه
ثم قولي للغضي ليه غيّرت الطبوع
تنوي الهجران وألا ظروفك عايقه
