أنشدك بالله يالطرف الخجول
خاطرك مكسور مدري وش بلاه
شفت ورد الخد يغشاه الذبول
وشفت دمع العين في جفنك ملاه
شفت في عينك حبيبي مايهول
القمر والشمس باين في سماه
نظرتك مدري جفا والا ميول
اتضح لي علم مدري عن نباه
كانها الفرقا حبيبي لا تقول
من غرق في الحب مايلقى نجاه
بيّن الخافي.. وصمتك لا يطول
أظهر اللي ماتبي تظهر خفاه
لا تقول أقدار عن قربك تحول
والتفاهم بيننا يصعب عطاه
حيث حبك صعب من قلبي يزول
شي أصعب من تجاريب الحياه
