قال من حده زمانه وانجبر
والليالي مع زمانه مايلات
أشتكي وأبكي وأداري ما ظهر
من دموعٍ من عيونٍ شاقيات
العمر يمضي وإلى فات العمر
بالدقيقة والقفول مقفلات
شانت الدنيا بعيني وانهمر
دمعي وثارت جروحٍ خافيات
عفت نوم العين حظي بالسهر
بس أسامر هالنجوم الساطعات
وبالسهر قلبي عليّ مثل الجمر
موقدات وسط قلبي كاويات
من سبب ما بي من هموم وكدر
من سيوفٍ غادراتٍ طاعنات
حيلتي ضاعت وسلواي الصبر
وأرجي المعبود صبري والثبات
طالبك يالله من حزنه مقر
عايش محزون والناس بحياة
أكتب الأبيات من دمٍّ حمر
والحروف بخاطري والذكريات
والختم صلوا على سيد البشر
عد نبت بالبراري نابتات
أو عدد ماهل من مزنه مطر
وانبتت في أرضها عشب ونبات
