الرثاء والنعي واعلان العزاء وسط الجرايد
حب ومواساة ومشارك محبّ في حزونه
ما دعاني خطب شاعر هاجسه يكتب قصايد
ما دعاني غير خطب خاطري ثوَّر سكونه
ما جرحني في الضمير وزوّد الحمّى وقايد
غير دمعة سيدي سلمان من محجر عيونه
يا طويل العمر يا مشكاي ليل الحزن سايد
كل ما خيم عليكم ليل ناشتنا ردونه
أنت مجروح الضمير من القدايم والجدايد
كل جرح في ضميرك تغلق البيبان دونه
ما بلينا إلا بحق عنه ما نقدر نحايد
لو تجمَّع قوة العالم سوى ما يمنعونه
مرسل من واحد يحيي العظام وهن همايد
جل سبحانه عظيم الشأن عما ياصفونه
يا محب العفو جبّار الخواطر بالجوايد
الوكيل اللي سبع الآفاق في كافه ونونه
جعل ضيفانك تعلَّق رحمتك فيهم قلايد
ظل طوبى منزل الفردوس الأعلى يسكنونه
وتحفظ هداج تيماء اللي على هداج زايد
القراح اللي شرابه يبهج اللي ياردونه
أنت مفراص الحديد وانت نسناس السعايد
هيلع من لاذ به ينعم ويامن في حصونه
بالمكارم نفح جودك للقريب والمحايد
شيخ نجد وجعل أهالي نجد لاجوا ياجدونه
