الوه ه ه ه ه!
نعم!
ممكن سؤال؟؟
تفضل!
ليش مراجعين المستشفيات يجيبون بزارينهم «وغدانهم «يعني «إعيالهم معاهم»؟؟
كيف يجيبونهم معاهم؟؟
يعني لما يجي الواحد منهم عنده مراجعة عيادة من عيادات المستشفى، تلقاه جايب معه كل «بزرانه» اللي بالبيت!! ثم يكبهم في «بهو» المستشفى! وعينك ما تشوف إلا الشر!!
«تِزحلق» أقصد تِزلج في هالممرات وكأنهم داخلين صالة تزلج!! لا.. وما هو كذا وبس! هذا معه عصير وذاك معه شاهي، والوالد جالس على كرسي الانتظار معه «الساندودشات»!! لا يهش ولا ينش!!
طيب والأم وينها عن اعيالها؟؟
الأم المسكينة تنتظر «سراها» أقصد دورها عشان تدخل على الطبيب المعالج لأن بعض العيادات في المستشفى مثل أمراض النساء والولادة ما يقيدون بالوقت اللي في تذكرة الموعد.
يعني اللي يجي الأول يدخل للكشف تقول عند خباز!!
طيب إذاً ويش قيمة الوقت المكتوب في تذكرة الموعد؟؟
ما دري!! بس اعتقد نظام مع شرط عدم الالتزام!!
والله مشكلة..
طيب نرجع للبزارين اللي غاثك وجودهم بالمستشفى مع أهاليهم المراجعين!! عاد أقولك.. يمكن ذاك المطعم واللي يدلعونه باسم البوفيه! هو السبب! ليه تظلمه؟؟
لأن «البزارين» يلحون بصراخ على أهاليهم.. نبي نروح معاكم عشان نشتري من مطعم أقصد بوفيه المستشفى!!
كل شي جايز! والمطلوب هالحين؟؟
ياخي المطلوب الحل..
الحل.. الشق أكبر من الرقعة! ولكن يفترض من ادارة المستشفى: تمنع دخول الأطفال عن طريق رجال الأمن أو رجال الشرطة العسكرية اللي ما هنا بأكثر منهم! أو تحط للأطفال حديقة ترفيهية عند المواقف وفيها ذاك المطعم أو البوفيه! ولكن بشرط ان تلتزم العيادات بالوقت اللي في تذكرة الموعد! لفوائد كثيرة أهمها: ان الأطفال «ما يمديهم» يعني ما يلحقون يخربون شي!! والثانية ان المراجعين يتعودون على الالتزام بالوقت المحدد للمراجعة والمكتوب في تذكرة الموعد! وأهم فائدة ان الموظفين اللي مستأذنين من رؤسائهم للمراجعة ما يصير عندهم «حجة» يعني عذر للتأخر!!
هاه ويش رايك؟؟
تمام بس متى!!!
| 
