اقصى حدود الوفاء وآخر عناوينه
اللي تركته كذا في قاع صحصاحي
جف الثرى عقب ما يبست بساتينه
تلعب بازاهير نبته هوج الأرياحي
ونظرت يم السما ما شفت لي عينه
حتى بروق الحيا ما بارقٍ لاحي
واقنعت نفسٍ على طاريه مسكينه
متولعة بالوفاء ودروب الأنصاحي
تلبس لها كل يوم من الفرح زينه
توهمت وايقنت في كل الأفراحي
ياما عطت كل غالي دون تثمينه
ما حسبت للخساير دون الأرباحي
والعمر ينقص قدر ما تكثر سنينه
والناس ما بين نزالٍ ونزاحي
وراس تسامى بعز الأصل ما أهينه
يا حي موتٍ يجي من نازف جراحي
حتى ولو الزمن مالت موازينه
ميلات الأيام درس العاقل الصاحي
والله ما حب لا خشمه ولا عينه
حتى ولو الثمن من غال الأرواحي
ثنتين للرجل ناموسه بعد دينه
لعل من يرخص الثنتين للماحي
وأنا ليا حضروا ابليس وشياطينه
ماني مداوي جروح الروح بالراحي
اخذت لي عن هجوس الليل تسنينه
في الثلث الآخر قبل فلاج الاصباحي
علاج يكثر سرور القلب ويزينه
للي يحب القدا ويحب الاصلاحي
والله هو اللي يمد العبد ويعينه
ويعوضه عن شقاه وكل ما راحي
