لا واحسايف يا بومتعب دفناك
قلوبنا بعد المفارق عليلة
لو البكا ينفع بدمعي بكيناك
القدر والمكتوب لازم تجيله
عسى النعيم وجنة الخلد ماواك
يا كاسب كل العلوم الجميلة
ليت المنايا يوم حانت تعداك
واللي كتب باللوح ما فيه حيلة
يا الله نور ظلمة القبر برضاك
الحق دربه يوم واجه عميله
الله يغفر لك ويمسح خطاياك
يوم الحساب وكل نفس ذليلة
خلقك كريم وطيبات سجاياك
الحلم طبعك والحقد ما تشيله
فيك الكرم والدين والصدق مبداك
مؤمن وفعل الخير دايم سبيله
مشهود لك بالخير وأنت بدنياك
بالآخرة ندعو لكم بالوسيلة
حبك طبع بقلوبنا كيف ننساك
لو مت عشنا به ليال طويلة
بالأمس تنعا ناس واليوم ننعاك
كل حياته بالبقاء مستحيلة
