سرى الليل يا سهران كثر السهر مافاد
تذوق التعاسه والمرارة تجرعها
سرى الليل والدنيا عذاب وشقا وجهاد
محاجر عيونك ملح الايام يلذعها
سرى الليل وايامك تعاقب شقا وعناد
واذا ما تطيعك يا بعيد النظر طعها
خلاص التقينا وافترقنا بلا ميعاد
عدو القلوب الفرد الاوحد مطامعها
خلاص انتها درس درسناه ماينعاد
قضى حبر صفحاته وجفت مطابعها
خلاص انتهينا والغلا بالغلا ينقاد
يبي روس ما تنزل وترخى مسامعها
يبي له قلوب ما تهادي ورى النشاد
يبي له رجال ما تغير طبايعها
ترى الباب يالغادي عن الريح له رداد
وترى النار تاكل باللهب من يولعها
نهانا رسول الله عن الكير والحداد
عليه السلام وسنته دوم نتبعها
قضى الدرس واعتقنا الضحيه من الجلاد
تضيق الدروب وعطف ربك يوسعها
خذ الدرس والعبره من الموت والميلاد
ترى النفس مولدها قريب لمصرعها
تماديت والدنيا تراها قريبة ماد
تفر الرحى وتلاعب العود باصبعها
حسبتك اليا جار الزمن ملتجي وسناد
الا وخسارة رمعة فيك رامعها
حسبتك ليا شح المطر واخلف الرعاد
كما عين مي ما توقف منابعها
حسبتك ليا ضاقت بعيني سكن وبلاد
ترد الهموم ودمعة العين تمنعها
لقيتك مثل غيرك ولو كنت عقب اجواد
تبث السوالف عند غيرك ويجمعها
وترى الثور جنّب عنه عنتر ولد شداد
يدور الزمان وقصة الثور نسمعها
توكل على الله يابن الاجواد رح من غاد
شف الثور مقفي سكة الثور رح معها
يضيق الفضا عندي وانا للدعاء معتاد
عسى الله يسنعها عسى الله يسنعها
