هات القلم هاته ولا وراق جبها
ماهج هاجوسي بليا سبايب
دنياي تضحك لي وأجامل عجبها
واضحك لها من غيض ماهي عجايب
اضحك لها وأدري عواقب نشبها
من شان ما أقع في شبوك النشايب
حيث المثل وضح وبين سببها
وشرح المثل ماهو عن البال غايب
الحاجة اللي ما تعناك اجتنبها
خلك وسيع البال طيب وطايب
ونفسك عن اللي ماتبا لا تغصبها
لو أنه أقرب من قريب القرايب
النفس عند الغيض يبدا غضبها
ومن وجه صاحبها تبين الغضايب
على حسب رأيي من اشيا كسبها
ان المصيبه مع قفاها مصايب
كلام شاعر والمعاني كتبها
يوم انها أومت بالفواد الهبايب
الطيّبه حاول بها واقتربها
والخيّبه تلقى لها انسان خايب
