عسى الخيال اللي مزونه ترادم
اللي نشأ مزنه من الغرب قبله
عساه لاحوّل من الغرب قادم
يمطر على دارٍ فياحٍ وعبله
دارٍ لاجيت ابها من الضيق حادم
استانس الخاطر وزان الطرب له
مامثلها ياعيال حواء من آدم
دارٍ تخيرها معزي وشبله
لاصار للوديان فيها تصادم
مكتظةٍ بالسيل لاهل وبله
والعشب جاء لزهور طلعه مقادم
مابين قيصومه.. وشيحه.. وربله
شوف الحياء يشرح صدور الأوادم
وإلا المحل والوقت ماحدٍ رغب له
وإستانس الشاوي ولاهوب نادم
وإستانس الوبال لازانت ابله
يرعون به من غير راعي وخادم
وراع العلف ياقف ولاحدٍ حسب له
وطاب الونس مع طيبين المنادم
ربعٍ معاشرهم يشد النجب له
هذي طراة الروح قدام هادم
والآدمي ما له عن اللي كتب له
