تعلا يا قصيدي لا بغيتك بالمواقف عون
ونجم في سما حلو القوافي واعذب لحونة
يا اجمل شيطنة تلقى لها من كل شكل ولون
تجي تعثا بصدرٍ ضمها من زايد المونة
انا لو اني اسكت صار همي في خفوقي كون
تجبر واحكم القبضة على الخفاق وركونة
وانا لولا الشعر يكبح جموح الخافق المحزون
خطير اصير مجروح الزمان المر مطعونة
احرر به أسير في خفوقي عنة ما يدرون
وافك الباب للكلمة بعد ماهي بمسجونة
اقول اللي ينسيني جنون العالم المجنون
اعبر عن معاناتي بنظم ابيات موزونة
احس اني نسيت اليا فتحت الباب للمكنون
وطويت الصفحة بصفحة بها الآمال مقرونة
عسى الله يحفظ اللي لا شكيت الهم قال تهون
يقول تهون ويهون الصعيب ان قال يا هونة
كلامه وان حكى بلسم دواء للخافي المدفون
يذوب الشمع ويموت الحزن فيني وفرعونة
عليها كل ما تطري سلام الخالق المسنون
سلام يرتكز بين الضلوع العوج مضمونة
علي ابطت وانا ما شغلت فكري بالذي يبطون
ولكن الغلا يفرض على المغلين قانونة
