البارحه عدي عليل ومسموم
وعد الجسد مرضان تسعين عامي
والعين عيا لا يلوج بها النوم
وقلبي تقل بالفور والفور زامي
لا تبتحل يا العبد لا صرت مهموم
انك تنام وخالقك ما ينامي
رزقك على اللي سير الشمس ونجوم
خالق نهار ومقتفيه الظلامي
خلاق ريش الطير يدرج به الحوم
معطيك شوف العين وقلب وفهامي
هو محتفي بالناس في دايم الدوم
الطف بها من عصبها والعمامي
لا تشتمت بالحظ والامر ملزوم
ربك خلق فيك اللحم والعظامي
ولاينو كل شي على غير مقسوم
لو تمسكه بين اربعك والبهامي
وافطن ترى المكتوب ياتيك معلوم
لو انك ابلم ما ترد الكلامي
ويا ربعتي ضدوا على كل عاصوم
في ساعة فيها تقوم الكرامي
والمرجله ما تستوي غير بعزوم
وكثر المناوي ما تفيد الهلامي
تفريق شوفتكم عن العز حاجوم
ترى الفعول الطيبه له زمامي
حاذور من يبرم على كل بيروم
يضحك لكم بالسن والقلب دامي
يبسطك با المهروج والخير وعلوم
وشفه على خمت وريدك شمامي
ولا صار هنا كرعان وهنا لحم كوم
ما يقبل العفشات راع السنامي
