يا ما حلا المقناص باطراف ساحوق
شمال عاج وغرب ضلع العجامي
دارٍ لطراد الولع صار له ذوق
يلقابها القناص عوض القطامي
يلقابها وحده وثنتين وفروق
ويرتاح باله مع فياض المحامي
فياض نجد اللي لها المداح مسبوق
قالوا بها الشعار زين الكلامي
قالوا بها من صافي الدر منطوق
لها بوسط القلب حب ووسامي
وان ربعت يطلع مع العشب زملوق
وتعاقب النوار مثل الخيامي
لا صار سيل وفي السما مزن وبروق
ياحلو مجلاسي ومحلا منامي
صوت «أم سالم» يسمعه كل معشوق
أصواتها وأصوات ورق الحمامي
ناخذ بها سجات والعمر ملحوق
قدام زرع الروح يبدأ الصرامي
وصلات ربي عد ما طب في السوق
على نبياً ساق شرقٍ وشامي
