يبدا الحجيلي بذكر الله مقاله
ينشد بلاد الوحي عبر القصيده
يوم الخليل أهداه ربي وهداله
فخر الوطن كعبه تزود رصيده
من يومها والفجر هل بهلاله
والمصطفى وحيه علينا مديده
وصف الحقيقه نور يمحي الضلاله
عسى خطانا تهتدي للرشيده
وإللي سمعني يرفع الصوت طاله
الله له الحكمه بنصرة عبيده
مرحوم يا شيخٍ تبني الرساله
رسالة المولى بسيفٍ يجيده
من عانده بالكفر حتماً لقاله
ضربه على راسه وينحر وريده
بسيف الشريعه يوم ربي عطاله
ساروا معه شعبه بحجه سديده
نال الشرف والعز والحكم ناله
أسس نظام المملكه بالعقيده
تلقى على نهجه مسيرة عياله
في ظلهم عشنا حياةٍ سعيده
هذا الوطن غالي ودونه رجاله
لولا عماده ينتهي في مهيده
وعماده السنه وشرع الجلاله
وطاعة ولاة الأمر سنه أكيده
والقائد الأعلى على الشعب آماله
من غيرهم يسند عليه السنيده
وإللي تناسى واجبه بالجهاله
عاله على ربعه وسيفه غميده
ما يعرف إن الحرب صاله وجاله
مثله يخرّب كل قصرٍ نشيده
وشعب السعودي يفتخر بالعداله
بوجه العداله ياخذ إللي يريده
ينخى الرجال إللي له الطيب أصاله
سد لوطنا من عيونٍ حسيده
يرسل مراسيله ويشرح سؤاله
يلقى جواب الخير بأول بريده
من عند أبوفيصل ويلقى مناله
ساسه على التقوى ونفسه زهيده
وإللي حليف الحق يهنى وصاله
وإللي على الباطل يلاقي وعيده
أرسى رواسي العلم وأرسى جباله
وأرسى رواسي مملكتنا المجيده
المدح لو هو طال ما أضفى سداله
فخراً لنا يا الله ترحم عميده
وإللي نصى شيخٍ منكس عقاله
ينصى الغضنفر بالخصال الحميده
اخص أبو متعب ليا جاء مجاله
نفسه ليا شاف المعاند عنيده
يحفظ حقوق الشعب من دون حاله
وكفه على صفق المراوغ شديده
من يطلبه محتاج يصخى بماله
وإللي شكاه الظلم يفرح بعيده
لا هان أبو متعب بطولة سباله
ولا هان أبو فيصل ومثلك عضيده
والنائب الثاني يشوقك نضاله
يجنح لدرب السلم ناصر حديده
وإللي وعيد الشر ينسى جداله
وإن حده العادي صهر له حديده
سلطان زبن الحق من هو مثاله
يشهد له المنحاش تسمع ربيده
ويا نايفا ما أنساك لا شان فاله
من حاسدٍ معتوه يذرف صديده
أمن الوطن واجب وحنا فداله
وإللي خذ الجانب عليه النقيده
لابد جوف الحب تلقى النخاله
وليا درى نايف هبوبه تحيده
وإللي خوي إبليس يلقى نصاله
وإللي على الفتنه يذوّب جليده
والأمن برهانه ومرتاح باله
وإللي نكر نعمه عسى الله يبيده
وسعود بن فيصل وريث السلاله
من لا عرف فيصل عواضه نديده
يا الله ترحم من يورث خصاله
وسعود صان الورث وأصبح يزيده
فارس رجيح العقل يعجز فصاله
أوصل حضارتنا لديره بعيده
جاب البحور السبع وأرسى حباله
وأرسى سفارتنا بخدمه فريده
شمس الخصومه تنجلي من ظلاله
بوجهه يصد الريح لو هي عتيده
يشهد لك القائد وعندي دلاله
همة رجال الفعل تنسى الجريده
لو زاد فخر الوطن ما به ملاله
لواهني إللي بأرضك وليده
ولولا الجريده تشتكي بالإطاله
لا سيّل بحوراً بحجه سديده
صالح يقول القول مما طرى له
وختامه الماضي وحاضر شهيده
