تحكم بي وعذبني ولك مني وفير الحب
تحكم بالعذاب وكثر وقلل على كيفك
وشب النار وضلوعي حطبها وانت لا تحطب
كيفتك زادها وزنادها هرجك وتوليفك
ابادلك المشاعر والمشاعر عنك ما تحجب
ولو انها تمشيني تحت حكمك وتصريفك
ولا تمشي تحت حكم المراكب والهبوب تهب
تضد الريح وامواج البحر في حكم تجديفك
ولامنك لمحت البارق اللي في سحابه شب
بليل الشوق والعطشان ما يرويه توصيفك
تذكر عاشق هزه هواك وبالمحبة طب
سرى ليل العنا والهم والهوجاس مع طيفك
طلعبك للنجوم ومانزل بك في غياب الجب
تشرف بالمحبة في هواك وزاد تشريفك
كتبتك للمشاعر لين صبيت الجواهر صب
وكلفتك غرامي يالعلك قد تكليفك
ولو كثرو ضيوف الحب لا تحتار لا تحسب
انا دار الضيافه لك وانا مضيافك وضيفك
بنظره منك تامرني ولك مني شعور الحب
تمتع بالمحبه لو تعذبني على كيفك
