بين الفراق وهمنا والحب والسر المشاع
والشوق وهروج المسا والخاطر اللي ما نساك
والليل وعيون الغلا والشعر وأسباب الوداع
والذكريات ودمعنا وسط الهدايا من لقاك
هجرتني لاجل الظروف وقلتها دون استماع
فجأه ولا يمدي عيوني تعتذر لك عن خطاك
هذا طبيعي طبعكم قسوه بعد حب اندفاع
جيت بغلاك ورحت ما كنك تعرف اللي وراك
لا تنتظر مني سؤالٍ يرتجي خلٍ وباع
حبك نهاية رحلتي وإعلانها حزة جفاك
كلي جروح بداخلي وان زدتها امرك مطاع
زيد الجروح وحطني ذكرى جريحٍ من هواك
خَلك علي درب الجفا دام الوفاء ولّى وضاع
وادمح خطاك بزلتك وانسى حبيبك يوم جاك
دامك كذا خَلك كذا واترك جريحك للضياع
واقسا على قلبٍ نذرته من حياتي في غلاك
وارجوك تحفظ سرنا دامه تعدانا وشاع
واذكر بنسيانك حروفٍ نبضها قصة وفاك
