ازكى التهاني والتباريك بالعيد
نزفها بخلاص لبو الجميعي
لحامي حمى الإسلام نسل الاماجيد
آل السعود أهل المقام الرفيعي
ومعها تحياتٍ من القلب وتزيد
بعنبر وكاد وريح مسكٍ طبيعي
ألذ من در أمهات المفاريد
اللي رعن أزهار نبت الربيعي
تهدى لبو فيصل اجموع وتفاريد
معايدة شعبٍ محبٍ امطيعي
أنت الذي مافيك شكه وتعقيد
وحلمك على شعبك وصدرك وسيعي
وفيك الكرم وهبه ولاهوب تقليد
كفك نداء وكفوف غيرك ضريعي
وجودك يعم اكهول ويتامٍ ابعيد
ويعم طفلٍ في امهاده رضيعي
وعندي على ذلك دليل وشواهيد
الصحف تكتب والاذاعه تذيعي
الله يمهلك سنينٍ تماديد
ويبقيك يا حصن البلاد المنيعي
يابن الرغيم امخلد المجد تخليد
عسى له الهادي محمد شفيعي
عبدالعزيز امحدد الملك تحديد
بمهره ورمح وحد سيفٍ ذريعي
هومات عنتر والزناتي وبو زيد
ما عادلنه فوق بنت الطليعي
خمسين عام وزود وبجهاد وجهيد
والسيف في يمناه يلمع لميعي
وفي رحلته ما حط أقامه وتبريد
ولا قال هذا حر ولاصقيعي
يقطع على عوص النظا نازح البيد
ويسري وياطا فوق شوك النقيعي
مرخى سموعه للضعوف الرعاديد
يسوقه الدافع وعزمٍ بتيعي
وعن الجزيره كسر الطوق والقيد
وقبله عصت غيره وعيت تطيعي
بيومٍ من أهواله تشيب المواليد
وتشبع به الضبعه وذيبٍ أمجيعي
فقر وجهل واطماع وحروب اتبيد
ولا فيه أمان إلا ذراع الشجيعي
واليوم فيها كل يومٍ لنا عيد
وهذاه من فضل البصير السميعي
ثم فضل حكام البلاد الصناديد
لعلهم دايم بعزٍ رفيعي
ولكم علينا حق دعوة وتمجيد
وطاعة ولاء ومعاهدٍ ما يضيعي
ولوفيه عضوٍ يدخله ريب ويحيد
يبتر ويرمى بالمحل الشنيعي
حنا العرب ولنا سلوم وتقاليد
وكل فدا عمرك لعمره يبيعي
