سقى الله روضة التنهات روضة كاسب الطولات
بسيل في عروض العرق الاعلى بانت حدوده
من مزون الوسامي لى ومرها صادق المدات
تشيل القشع شيل وبرقها ماتفصل رعوده
تخليها على وقت الربيع تشابه الجنات
يغنى طيرها والعشب فيها زافت فنوده
وتلبس مع مجى مولاي ثوب العز والفرحات
تباشر به ويسعدها رفيع القدر بسعوده
فهد فهد الزعامه كاسب العليا وله عادات
حكيم الراى عقاده وهو حلال معقوده
عضيد من التجابه صامل الوقفه راع الفزعات
يزبن من تلوى به ويكد له على العوده
ولامنه حزبنا شى يبقى ساهرٍ مابات
يشيل هموم شعبه ماشكى منها ولاتكوده
عسى عمره طويل ويمنعه ربى عن الافات
نقول أمين جعل سنين عمره دوم ممدوده
ومهما أكتب على الاوراق في مولاي من ابيات
يجف الحبر ما يحصى مواقيفه ومجهوده
ويهنابه وطنا منبع الاسلام والخيرات
عليه أزكى التحايا بالولاء والحب مردوده
نبيع الروح من دون الوطن في حزة الشدات
وفي وقت الرخا نبنى ونحسب كلنا جنوده
