سلام يا أمير بك الطيب مبذور
يا للي بشخصك يكملن المعاني
يا ابن الملوك اللي لهم بالزمن دور
يشهد لهم بالطيب قاصي وداني
إنت الأمير اللي بالاحسان مذكور
يا سيدي طيبك مع الناس باني
يا بن طلال اللي لك المدح منشور
ترفع لك البيضا بروس المباني
يا سعد من جالك من الوقت معسور
تطلق إحجاج اللي من البعد عاني
للحق نور ودايم بوجهك النور
وطويل يمنىً بالكرم والحساني
وتعتق رقاب فوقهن الحق مسمور
بجاهك ومالك يا عريب المجاني
منصا الرجال وفي المهمات منعور
ولك فزعة تتعب طوال اليماني
وتسوق مالك ما تحسب لمذخور
ترق المعالي ما تحب الطماني
ومفتوح بابك دايم الدوم مخبور
ومن جاك يقضي لازمه في ثواني
لك مجلس بالطيب والذكر معمور
وعلى الصحون تحط حيلن سماني
وأقول قول ما يكذب ولا زور
وكل يوكد ما نطق به لساني
عساك يا وليد في عز وسرور
يا للي في وجهك للمروءة مكاني
وختامها جعلك من الشر ما جور
الله يجيرك من صدوف الزماني
وارجي السموحة كان في قولي قصور
وصلاة ربي عد وبل الغشاني
