شاقني شبل الفهد في عرضةٍ له
يوم شفت السيف يلمع في يمينه
مع أسودٍ كل منهم عزوةٍ له
موحدين الله ودينه ناصرينه
يوم طب الفيصلي والسيف سله
لوّحوا له واهتفوا له حاضرينه
زين منظر محزمه مع مجندٍ له
ومن خيار الجوخ ملبوسه ثمينه
ماخذٍ من والده فنه ودله
بالشجاعة والسياسه عارفينه
ومن معزّي ماخذٍ زين الجبله
ناهج نهجه وينهل من معينه
ياليال العز جودن واهتفن له
وياكريم الوجه مهّل في سنينه
ويا طيور الشط بالله غردن له
وادعن الله ما يوفق حاسدينه
ويا هبايب نسنسن ثم ذعذعن له
وعطرن جوّه بريحة ياسمينه
في شبابه حاش جل الطيب كله
ينتقي جزله ويطمع في سمينه
سادة ملوك الجزيرة قدوةٍ له
بالمراجل والخوال مسندينه
الوفا والجود بذله عادةٍ له
أبو تركي ستر من يوضي جبينه
ريف عين اللي نصاه بحاجةٍ له
ما يعوّد منه خاليةٍ يدينه
كم يتيم قام يمسح دمعةٍ له
وكم مدين جاد في تسديد دينه
وكم مريض عالجه من علةٍ له
وساق عنه التكلفه لمعالجينه
وكم فقيرٍ سكنه في وسط فله
لم شمله واهتنت بالنوم عينه
والأرامل والمعاقين بسجله
حقهم من سيدي متسلمينه
كثرة الإنفاق والله ما يمله
للضعوف وللضيوف وقاصدينه
نوٍ أسبل بالمطر والغيث هله
لاح برقه والرعد تسمع حنينه
